رجل برج الحمل
متفائل، طموح، مغامر وشغوف، قائد بطبعه، صريح جدا، يعشق التحدي وتجربه كل حاجة جديدة، كاريزمته قوية وشخصيته مميزة، نشيط ويحب الحركة ودايما هو الشخصية الحركية في وسط اصحابه وعائلته، ممكن يكون مندفع واحيانا بيكون عنيد
دي بشكل عام مواصفات رجل برج الحمل وهو من مواليد الفترة من 21 مارس الى 19 ابريل.
مواصفات رجل برج الحمل
الرجل الچان
رجل برج الحمل يحب اوي اه يكون محط اعجاب البنات، بيدخل في العلاقات دي من باب التحدي وبيكون عنده يقين انه حيكسب وده بسبب الشغف والروح القتالية اللي بيتمتع بيها رجل برج الحمل، بيعرف امتى يبتسم ابتسامه ساحرة وامتى يجامل وامتى يغازل وعشان كده في 99% من الحالات بيكسب التحدي، وعشان كده كمان تلاقي عنده معجبات كتير وبينطبق عليه لقب حبيب الجماهير.
محظوظة اللي يحبها
رجل الحمل بيؤمن تماما بالحب المثالي وبالشريك المثالي اللي يتنطبق عليه كل الصفات اللي هو بيتمناها، ويوم ما حيلاقيها حيقع في حبها فورا ومش حيقبل كلمة رفض، وعلى طول حيبدأ معركته ومحاولة الوصول لقلبها والفوز بيها، وكل ما كانت المعركة اصعب كل ما ده حيديله حماس اكتر عشان يوصلها ويكسب حبها وموافقتها.
عاشق للتحدي
الرجل الحمل بيدور على التحدي في كل مجالات حياته، في حياته العملية والشخصية.. في شغله هتلاقيه بيدور على المشاريع الجديدة الصعبة, وهيشتغل فيه بحماس منقطع النظير وغالبا في النهاية بينجح.. حتي لو كان المشروع نجاحة صعب بالنسبه للناس التانية, بس بالنسبة للرجل ده مفيش تحدي أبدًا صعب وعلي العكس بقي لو كان شغال في مشروع بيتقدم بصورة بطيئة هتلاقيه زهق ومش قادر يكمل فيه لإنه صبره قليل ومش بيقبل انه يكون شغال في حاجة مش ناجحة…كمان في العلاقات موضوع التحدي موجود وبشدة، هو كل مايشعر إن البنت اللي هو معجب بيها صعب الوصول ليها هتلاقيه بيبذل المستحيل عشان يوصللها وهيفضل يحاول ويحاول لحد لما ينجح زي ماقلنا في النقطة اللي فوق.
قلبه ابيض جدا:
بالرغم من ان رجل الحمل احيانا بيبان مسيطر وممكن كمان عصبي وعدواني، لكن في الحقيقة هو حساس جدا من جواه وقلبه ابيض اوي، لو لقى ان شريكة حياته متفهمه شخصيته وبتقدم تنازلات عشان علاقتهم تستمر فهو مش حيتردد انه يقدم تنازلات هو كمان وبمنتهى البساطة.
الشريكة القوية من اهم احتياجاته:
رجل برج الحمل يحب شريكته تكون قوية ومحاربة زيه، ويحبها تتكلم معاه وتناقشه بالتساوي من غير خضوع او ضعف بالعكس يحب يحس ان قوته لها قوة مقابلة عندها، بيحتاج اوي للشريكة اللي تساعده في قراراته وتسانده في كل الخطوات اللي بياخدها لحياته يحب الشريكة اللي تشجعه وتقوية ايا كان قراره ده، ومن ناحيته هو بيلتزم بوعوده وتعهداته وبيخلص لشريكته ويكون وفي لها جدا.
كريم من غير تبذير:
لو شوفت تصرفات رجل برج الحمل من بعيد ممكن تتهمه بالتهور والتبذير لأنه دايما يشتري اللي على مزاجه واللي بيعجبه بصرف النظر هو محتاجله ولا لأ، لكن لو كنت قريب منه شوية حتعرف ان هو دايما محافظ على هامش من الامان مش دايما بيخلص كل فلوسه لازم بيحتفظ بشوية مدخرات وبيعرف امتى هو دخل مرحلة الخطر ولازم يخلي باله، اما الادخار بالنسبه له فهو بيحوش عشان يشتري اللي بيحبه كله ومش حيتأخر عن صرف الفلوس في شراء الحاجات اللي بيحبها عشان عارف انه حيدخر ويحوش مرة تانية.
القائد والمدير:
رجل برج الحمل يفضل مواقع القيادة يحب يدي الاوامر اكتر من تلقيها، طبيعته اللي بتخليه يكون قائد هي اللي بتحركه، عشان كده رجل الحمل بينجح في الاعمال اللي بيكون هو مديرها او في موقع القيادة فيها، يعني رجل برج الحمل بيتميز اوي في مهنة الطبيب او المحامي، او العمل في البورصة او انه يكون صاحب بيزنس خاص بيه.
اجتماعي وصريح:
بيحب تكوين الصداقات الجديدة ويحب يدخل في الحوارات ويتكلم ويقول رأيه وخبرته في المواضيع المفتوحة للكلام، والمشكلة او العيب اللي بيواجه المتعاملين مع رجل برج الحمل انه مش بيعرف يذوق الكلام يعني لو سألته عن رأيه في حاجة حتسمع منه الرد الحقيقي اللي هو شايفه من غير مجاملة ولا ذواق، اما بالنسبة للنصيحة فهو احسن واحد ينصح لو اتطلب منه نصيحة ويقولها ويقدمها بمنتهى الاخلاص لكن غالبا لو حد نصحه مش بيهتم بيسمع اوي ولا بيدي ودنه للنصايح.
اللبس على الموضة
بيحب اوي تقاليع الموضة ويحب يجرب الجديد من الموضات والمميز فيه انه بيحب اللون الاحمر، وفي وسط اصحابه بيبقي معروف انه رائد في الموضة ولبسه شيك وذوق.
رجل برج الحمل باختصار كده عبارة عن انسان متفائل, طموح, مندفع ومقبل على الحياة… بيدور على اللي يرضيه ويبسطه وعايش ببساطة ومن غير عقد، ولو قابل اللي تفهم طبيعته كويس وتقدمله التجديد والاثارة المطلوبه في حياته يبقى حيعيشوا في حب ابدي مالهوش نهاية.